শনি-স্তোত্রম্

শ্রীশনৈশ্চরায় নমঃ।
অস্য শ্রীশনৈশ্চরস্তোত্রমন্ত্রস্য দশরথঋষিঃ শনৈশ্চরো দেবতা ত্রিষ্টুপ্ ছন্দঃ শনৈশ্চরপ্রীত্যর্থং জপে বিনিয়োগঃ।
দশরথ উবাচ।
কোণোহন্তকো রৌদ্রযমোহুথ-বভ্রুঃ
কৃষ্ণঃ শনিঃ পিঙ্গল-মন্দ-সৌরিঃ।
নিত্যং স্মৃতো যো হরতে চ পীড়াং
তস্মৈ নমঃ শ্রীরবিনন্দনায় ।।
সুরাসুরাঃ কিম্পুরুষোরগেন্দ্রা-
পগন্ধর্ব-বিদ্যাধর-পন্নগাশ্চ ।
সীদন্তি সর্বে বিষমস্থিতেন
তস্মৈ নমঃ শ্রীরবিনন্দনায়।।
নরা নরেন্দ্রাঃ পশবো মৃগেন্দ্রা
বন্যাশ্চ যে কীটপতঙ্গভৃঙ্গাঃ।
সীদন্তি সর্বে বিষমস্থিতেন
তস্মৈ নমঃ শ্রীরবিনন্দনায়।।
দেশাশ্চ দুর্গাণি তথা বলানি
সেনানিবেশাঃ পুরপত্তনানি।
সীদন্তি সর্বে বিষমস্থিতেন
তস্মৈ নমঃ শ্রীরবিনন্দনায়।।
তিলৈর্যবৈর্মাষগুড়ান্নদানৈ-
লৌহেন নীলাম্বরদানতো বা।
প্রীণাতি মন্ত্রৈর্নিজবাসরে য-
তস্মৈ নমঃ শ্রীরবিনন্দনায়।।
প্রয়াগকূলে যমুনাতটে চ
সরস্বতীপুণ্যজলে গুহায়াম্ ।
যো যোগিনাং ধ্যানগতোহতিসূক্ষ্ম-
স্তস্মৈ নমঃ শ্রীরবিনন্দনায় ।।
যোহন্যপ্রদেশাৎ স্বগৃহং প্রবিষ্ট-
স্তদীয়বারে স নরঃ সুখী স্যাৎ।
গৃহাদ্ গতো যো ন পুনঃ প্রয়াতি
তস্মৈ নমঃ শ্রীরবিনন্দনায় ।।
স্রষ্টা স্বয়ম্ভুর্ভুবনত্রয়স্য
পাতা হরিঃ সংহরতে পিনাকী।
একস্ত্রিধা ঋগ্যজুঃসামমূর্তি-
স্তস্মৈ নমঃ শ্রীরবিনন্দনায় ।।
শন্যষ্টকং যঃ প্রযতঃ প্রভাতে
নিত্যং স পুত্রৈঃ পশুবান্ধবৈশ্চ ।
পঠেচ্চ সৌখ্যং ভুবি ভোগযুক্তঃ
প্রাপ্নোতি নির্বাণপদং তদন্তে।।
কোণোহথ পিঙ্গলো বভ্রুঃ কৃষ্ণো রৌদ্রোহন্তকো যমঃ।
সৌরিঃ শনৈশ্চরো মন্দঃ পিপ্পলাদেন সংস্তুতঃ।।
এতানি দশনামানি প্রাতরুত্থায় যঃ পঠেৎ ।
শনৈশ্চরকৃতা পীড়া ন তস্য ভবতি ক্বচিৎ।।
ইতি শ্রীদশরথকৃতং শ্রীশনৈশ্চর-স্তোত্রং সম্পূর্ণম্ ।